إعذرونى على كتابة هذه الرسالة بالعامية لأن مينفعش تتكتب بالفصحى
قالك إيه قالك أه .. قالك الشعار بدال ما كان من أجلك أنت بقى من أجل أولادك
على أساس إنك يعنى لا مؤاخذة مطمن ومترستق ونايم ومفخد وحاطط فى بطنك شادر بطيخ من كتر الأمن والأمان اللى بيبك من حواليك
فعشان يا حرام متحرمش عيالك من الإحساس الطاغى الظريف اللطيف أبو دم خفيف دا .. لازم ترشح وتنتخب وبكامل إرادتك وبعلمك النافى للجهالة .. أعضاء الحزب الوطنى الديموقراطى
مش بأقولك ..
عشان تطمن على ولادك ... إنهم يتولدوا فى مستشفى كويسة - زى اللى إتولد فيها ولادك - ومدفعتش فيها دم قلبك ولا طلع عين اللى جابوك عشان تجيب فلوس الولادة فيها
عشان تطمن على ولادك .. إنهم يطلعوا يلاقوا مدرسة هاى كلاس .. زى اللى سيادتك وسيادتى إتعلموا فيها .. ويتمتعوا بمجانية التعليم اللى برضه سيادتك وسيادتى وسيادتكم إتمتعوا وإتمرمغوا فى ترابها ... ولا الحوجة بقى للدروس الخصوصية اللى بتستنزف مليارات من جيب سيادتك وسيادتى وسيادتكم وسيادتهم ومع ذلك العيال مش فاهمة حاجة وأكثر من 80% مش بيعرفوا يقروا ودى إحصائية رسمية لا مؤاخذة
عشان تطمن على ولادك .. وتقدر تصرف عليهم .. وإنت مش عارف تاخد مرتب عدل يكفيك أكل وشرب وبيحاولوا يفاوضوك على ربعميت جنيه عمى مع إن فى حكم بأنك المفروض تاخد مرتب مايقلش عن ألف وميتين جنيه .. !!!!!!!!!
عشان تطمن على ولادك .. وتقدر توفر لهم الأكل مش مهم بقى الأوطة توصل 10 جنيه وتبقى أغلى م التفاح عشان وزير الزراعة الجاهل بوظ الزراعة فى مصر وبيتكلم فى الدعم كمان .. مش مهم رغيف العيش أبو خمسة ساغ اللى مينفعش تشمه .. مش تاكله .. مش مهم الأكل المسرطن والمهجن والمعطوب والمعيوب .. مش مهم كل ده .. المهم إنك تطمن على ولادك
عشان تطمن على ولادك .. إنهم لو تعبوا لا قدر الله يلاقوا مستشفى كويسة يتعالجوا فيها زى اللى حضرتك وحضرتى وحضراتكم ممكن يتعالجوا فيها دلوقتى اللى هى المستشفيات العامة العمومية اللى كل الخدمات الصحية متوفرة فيها على أعلى مستوى ... يمكن أحسن من المستشفيات الخاصة .. وإوعى تفتكر إنهم لو مكانش معاهم فلوس هيموتوا فى هدوء .. زى دلوقتى .. لألألأ .. أكيد هيبقى الوضع غير كده
عشان تطمن على ولادك .. إنهم لما يتخرجوا من الجامعة .. دا إذا دخلوها أساساً .. يلاقوا وظيفة محترمة بمرتب محترم .. فى المشروعات الكتييييييييييييييييير اللى الحزب قاتل نفسه عشان يوفرها يا عينى .. وبرضه يبقى الواد زيك .. يشتغل من غير ما يكح تراب .. من غير ما صاحب الشغل يطلع عين اللى جابوه .. اللى منهم حضرتك .. عشان شوية الملاليم اللى بيرميهمله أخر الشهر .. عشان صاحب الشغل ما يذلش فيه ويحسسه إنه مشغله عنده شفقة وإحسان .. عشان صاحب الشغل ما يكتبوش وصل أمانة عشان يرضى يشغله أصلاً .. !!!
عشان تطمن على ولادك .. إنهم لما يتخرجوا ويشتغلوا .. يلاقوا شقة يتجوزوا فيها .. أكيد بقى الشقة دى هتبقى فى القطامية هايتس .. أو فيلا فى الرحاب .. يعنى مش أقل من كده .. زي ما حصل معاك بالظبط ..
عشان تطمن على ولادك .. بعد ما يطلع القديم والجديد عليهم .. عشان يجيبوا الشقة .. هب تلاقى وزير المالية .. فاقعهم قانون .. يحصل ضريبة على الشقة اللى هو أصلاً دافع تمنها من جيبه .. !!!
عشان تطمن على ولادك وتضمن إنهم لو فكروا فى أى حاجة تعارض الحكومة .. ديتهم إيه .. لفافة بانجو .. إسكندرانى .. وهب فى بق الواد من دول .. وخلاص هيريحوه و يريحوك منه كمان . !!!
عشان تطمن على ولادك .. إنهم يقدروا يعبروا عن رأيهم بصراحة من غير ما يخافوا .. هتلاقى ناس طالعينلك من المجلس اللى إنت إنتخبته
يطالبوا وزارة الداخلية تضربهم بالرصاص .. !!!
عشان تطمن على ولادك لازم تفكر كتيييييييييييييييييييييييييييييييييييير قبل ما ترشح أو تنتخب الحزب الوطنى
وإليكم هذا المحتوى
